O conselleiro de Cultura, Lingua e Xuventude, José López Campos, reivindicou este venres a Galicia como “epicentro creativo e viveiro constante de novos artistas”. Fixoo durante a inauguración da mostra Breviario, da artista ourensá Tamara Feijoo, que se pode visitar na sede da Fundación Dardo Instituto do Deseño e das Artes Contemporáneas (DIDAC) en Santiago de Compostela.
O responsable autonómico puxo en valor a carreira de Feijoo, lembrando que as súas obras “se exhibiron por toda a Comunidade, así como en institucións de referencia en España e Portugal”. A exposición que agora chega a Compostela xa fora presentada anteriormente no espazo artístico Appletón de Lisboa.
Segundo explicou a Xunta, Breviario é unha pequena colección de pezas concibidas como mostras e experimentos pictóricos, nas que están presentes o debuxo e a pintura. A artista emprega papeis vellos de antigos cadernos que recompila ela mesma e que se converten na base das súas creacións.
López Campos subliñou o interese dos creadores galegos por compartir os seus proxectos no país, ao tempo que manteñen unha traxectoria con proxección internacional. Neste sentido, asegurou que o labor de artistas como Feijoo é exemplo da capacidade de Galicia para situarse no mapa cultural “con recoñecemento dentro e fóra da Comunidade”.
