A Real Academia Galega (RAG) conmemora este venres o Día Europeo das Linguas cunha nova iniciativa: a creación do Premio ‘Na lingua que eu falo’, que na súa primeira edición recoñece o traballo do CEIP Milladoiro de Malpica.
Segundo explicou a institución, o galardón nace co obxectivo de premiar proxectos e experiencias que impulsen o galego entre a poboación infantil, tanto no eido escolar como noutros espazos. A resolución desta primeira edición coincide coa data conmemorativa e, ao tempo, a RAG aproveitou a ocasión para reclamar “un maior compromiso, desde a Unión Europea e desde Galicia, coa defensa do idioma propio”.
O presidente da RAG, Henrique Monteagudo, lembrou que se atopa en tramitación a solicitude para o recoñecemento oficial do galego e do resto das linguas cooficiais do Estado español en Bruxelas. “Esta conmemoración é unha boa ocasión para reivindicar, unha vez máis, a plena oficialidade da nosa lingua en todas as institucións europeas”, indicou.
Sobre o recoñecemento ao centro de Malpica, Monteagudo puxo en valor “o bo facer do profesorado” e recalcou que se trata tamén dun “premio ao conxunto da súa comunidade educativa”, que poderá actuar como “espello” para outras iniciativas de promoción do galego na infancia.
