O festival Maré abriu a súa sexta edición cunha presentación na sala Capitol na que a dirección fixo un chamamento a pensar a cidade a través da cultura e do encontro entre públicos. O programa, deseñado para cinco días e as súas noites, combina concertos de artistas de distintas latitudes con proxectos locais, actividades de rúa e colaboración co tecido de clubs e salas compostelás.
Desde a organización subliñouse que Maré procura chegar a audiencias diversas con propostas de pago e gratuítas, ocupando espazos como a Igrexa da Universidade e escenarios de pequeno e medio aforo. “Maré é un proxecto pensado para esta cidade desde o sentimento e desde o coñecemento da realidade na que nos desenvolvemos”, indicouse no acto, no que tamén se apelou aos retos do turismo cultural e á necesidade de repensar o papel de promotoras, artistas e público.
O cartel inclúe estreas e proxectos exclusivos, con presenza de creadoras e creadores procedentes de Cataluña, Níxer, Colombia, México, Arxentina, Castela, Portugal ou Brasil, xunto co talento galego. A apertura correrá a cargo de Felisa Segade, quen presentará un novo espectáculo de tradición oral con arranxos de Pedro Ramas e unha formación con catro saxos. “Pensamos que é un espectáculo que non vai deixar indiferente a ninguén”, adiantou a artista, que definiu a proposta como un paso máis na posta en valor do patrimonio musical transmitido polas mulleres.
A programación esténdese tamén a outras disciplinas —poesía e performance— e ás marexadas Percuta, accións de dinamización das rúas. A dimensión social do festival concrétase nun paquete de medidas de accesibilidade: traducción simultánea, lingua de signos en determinadas citas e dispositivos de vibración para persoas con dificultades sensoriais. “A cultura ten que ser un dereito”, afirmouse na presentación, que incidiu en favorecer a participación ampla e maioritaria.
A rolda contou co apoio das institucións que sosteñen o proxecto. Desde a Secretaría Xeral da Lingua, Valentín García enmarcou o festival na celebración do Día Europeo das Linguas (26 de setembro): “Maré é unha ponte de contacto entre linguas e culturas e suma ao plurilingüismo que Europa celebra”. A Deputación da Coruña destacou a expansión do seu programa de axudas a festivais e a singularidade de Maré como evento descentralizado que activa espazos simbólicos da cidade. Pola súa banda, a concelleira de Capitalidade Cultural e Turismo, Míriam Louzao, enxalzou o papel do encontro: “Maré convértese un ano máis nun espazo de diálogo e diversidade, en sintonía coa nosa concepción da cultura como dereito e de Santiago como capital cultural”.
No peche, salientouse a posta en marcha dunha plataforma profesional para impulsar a proxección internacional de proxectos galegos, con pitchings, speed meetings e showcases en colaboración coa AGADIC/MAU, e a participación de arredor de vinte profesionais de Portugal, Colombia, Italia, Marrocos, Francia ou Cataluña. O festival reservará tamén un final con acento solidario, ao acoller o concerto de Solband acompañado dunha frota de artistas contra o xenocidio, nun subliñado da vertente cívica que acompaña o programa musical.
A organización recoñeceu a complexidade de financiar un evento de aforos limitados e apelou ao público como socio esencial dun programa amplo que busca abrir portas a novos nomes, territorios e linguas. “A nosa aspiración é que a marca Maré sexa sinónimo dunha selección musical que convida a descubrir”, resumiu a dirección.
