O Centro Galego de Arte Contemporánea (CGAC) acolleu este martes a presentación de ABERTO 2025, o encontro anual co que a asociación de galerías Contemporánea abre de forma conxunta a tempada de arte en Galicia. O acto contou coa participación de Santiago Olmo, director do CGAC; Luisa Pita, presidenta da asociación; Lucía Suárez, directora da galería Dupla; e o director xeral de Cultura da Xunta, Anxo Lorenzo.
Olmo salientou a importancia de impulsar o tecido artístico galego mediante proxectos colaborativos e recordou que o CGAC leva tres edicións adquirindo obra no marco de ABERTO. Pola súa parte, Luisa Pita definiu a iniciativa como “unha cita fundamental no calendario cultural de Galicia” e puxo en valor tanto a oportunidade que ofrece aos artistas como a capacidade de xerar redes entre cidades e proxectar o traballo cara ao exterior.
Na súa intervención, Pita agradeceu o apoio de entidades como o Hotel Compostela, a EASD Mestre Mateo, a Fundación Centro de Arte María José Jove, Hijos de Rivera, a Universidade de Santiago de Compostela e, de forma especial, a Consellería de Cultura da Xunta de Galicia.
Lucía Suárez fixo un repaso á traxectoria de ABERTO e destacou que “non só é unha programación de exposicións, senón un compromiso co territorio, coa creación e co futuro da nosa cultura”. Nesta edición participarán artistas como Martha Araújo, Samuel Salcedo, Regina Giménez, Pablo Barreiro ou Vicente Blanco, en diálogo con figuras nacionais e internacionais presentes en edicións anteriores.
Pechou o acto Anxo Lorenzo, quen subliñou a capacidade de Contemporánea para reforzar ano tras ano o proxecto e a importancia do asociacionismo para superar as dificultades do sector. O representante da Xunta insistiu no apoio institucional a estas iniciativas e referiuse a ABERTO como un proxecto “consolidado e con capacidade de expansión”.
A programación desenvolverase do 18 ao 20 de setembro en Santiago, A Coruña, Vigo, Ourense e Lugo, reunindo dez galerías cun conxunto de exposicións que configuran un percorrido artístico conxunto por Galicia.
Entre as propostas, destaca o proxecto Territorio Contemporánea 2025, que se poderá visitar no Centro Obra Social ABANCA da Praza de Cervantes (Santiago). Comisariado por Diego Cascón, ofrecerá unha selección de obras dos artistas participantes e un diálogo entre fondos das galerías e a colección de ABANCA, con pezas de Marc Chagall, Miquel Barceló, Susana Solano ou Helena Almeida, xunto a creacións de artistas galegos actuais.
A sexta edición de ABERTO conta co patrocinio principal da Consellería de Cultura da Xunta e co apoio de diversas entidades culturais e privadas que colaboran no desenvolvemento desta cita.
