O Festival Intercultural deu comezo hoxe na Alameda de Santiago, nun acto inaugural no que estivo presente a alcaldesa Goretti Sanmartín. A rexedora puxo o foco na importancia de facer da convivencia entre culturas unha realidade diaria e non só un evento anual.
Sanmartín afirmou que o compromiso do Concello é “un compromiso cos dereitos, coa xustiza e co convivio real”. A alcaldesa subliñou que a defensa da dignidade das persoas non pode ser obxecto de negociación e que as administracións teñen a responsabilidade de crear condicións para favorecer a integración.
No escenario estivo acompañada pola primeira tenente de alcaldesa, María Rozas, así como por representantes do Partido Popular e polas concelleiras non adscritas Mila Castro e Mercedes Rosón. “O conxunto da Corporación Municipal está de acordo en que hai que avanzar nestas políticas”, destacou a rexedora.
A alcaldesa lembrou que o Concello mantén dende hai tempo a Unidade de Atención ás Migracións (UAMI), que ofrece asesoramento e acompañamento ás persoas recén chegadas, e puxo en valor o novo programa específico de mediación con apoio psicosocial. Tamén citou a iniciativa Compostela Convive, que permite desenvolver actividades como as do festival, centradas na gastronomía, o teatro, a literatura ou a música.
Sanmartín apelou á memoria da emigración galega como elemento que axuda a comprender mellor a situación das persoas migrantes. “Sabemos moi ben o que significa ter que marchar e buscar a vida fóra”, dixo, defendendo unha maior cooperación entre administracións para axilizar trámites e evitar situacións de gueto.
A rexedora advertiu, ademais, contra a indiferenza e a apatía como principais barreiras actuais fronte á integración, e instou a combater “as políticas de odio e racismo” con medidas activas a prol da diversidade.
O acto contou coa colaboración da Plataforma polo Emprego e dos equipos municipais de servizos sociais. A alcaldesa pechou a súa intervención proclamando que “todas as persoas e todos os pobos son necesarios e o único que fan é enriquecer a nosa vida”, antes de declarar inaugurada oficialmente esta nova edición do Festival Intercultural.
