O Ateneo de Santiago presentou este xoves a VII edición do Festival Ateneo Barroco, que se desenvolverá na cidade entre o 8 e o 22 de outubro de 2025. O programa, agrupado baixo o título Instrumental #1, inclúe seis concertos e unha oferta de actividades complementarias arredor da música antiga.
O presidente do Ateneo, Francisco Candela, subliñou o “esforzo organizativo importante” que supón para a entidade manter este evento, mais insistiu en que se fai porque “prestixia a cidade de Santiago, complementa a súa imaxe como cidade barroca e permite poñer á disposición dos cidadáns unha alternativa musical distinta”. Engadiu que por primeira vez existe un convenio de colaboración coa Quincena Musical de San Sebastián e destacou “a facilidade para participar neste Festival por parte dos cidadáns, con prezos moi asequibles porque queremos chegar a todo o público”.
As entradas e abonos xa están dispoñibles na web oficial do festival (www.festivalateneobarroco.gal). O abono para os seis concertos custa 35 euros (25 euros para menores de 30 con Carné Xove e socios do Ateneo). As entradas individuais teñen un prezo de 10 euros, cunha tarifa reducida de 8 euros.
O director artístico, José Víctor Carou, explicou que esta edición marca o inicio dun proxecto artístico bianual: “Baixo o título Instrumental queremos resaltar o papel fundamental que os instrumentos teñen desempeñado neste repertorio”. Entre as novidades destacou a presenza da musette, instrumento da familia das gaitas que gozou de gran difusión nos séculos XVII e XVIII e que será interpretado pola galega Nadia Vázquez.
O programa comezará o 8 de outubro no Teatro Principal coa Camerata Boccherini, liderada por Massimo Spadano e Paolo Grazzi, cun repertorio de sonatas e triosonatas do Barroco tardío. O 10 de outubro, tamén no Principal, actuará Ars Atlántica con Nadia Vázquez (musette), Anna Margules (frautas de pico), Calia Álvarez (viola da gamba) e Manuel Vilas (arpa de dúas ordens), cun repertorio de danzas francesas na España barroca.
O 14 de outubro, o Salón Teatro acollerá o concerto do clavecinista Kenneth Weiss, cunha homenaxe a Wanda Landowska. O 17 de outubro, a Igrexa da Universidade será escenario das Lamentacións de Delalande a cargo de María Espada e o Collegium Musicum Madrid. O 21, a Capela Compostelana ofrecerá Les Charmantes Invasions, centrado na influencia francesa, e o festival pechará o 22 de outubro no Paraninfo da Universidade con Ars Lachrimae, concerto de laúde a cargo de Enrike Solinis.
A programación complétase con actividades paralelas: unha conferencia de Beatriz Cancela, a proxección do documental The Quest for Tonewood, un club de lectura con obras de Harriet Constable e Helena Attlee, encontros cos artistas e o concerto de improvisación Fractais Sonoros do pianista Alejandro Vargas no Hostal dos Reis Católicos.
