A Cidade da Cultura pechará este sábado a exposición ‘Rafael Úbeda. Visión retrospectiva’ cun concerto de cámara dirixido por Rogelio Groba Otero, que se celebrará ás 12:00 no Museo Centro Gaiás con entrada libre. A iniciativa, organizada pola Xunta de Galicia, pretende subliñar a presenza constante da música no universo creativo do pintor, tamén violinista de formación.
A mostra, comisariada por Pilar Corredoira, inaugurouse en abril e recibiu ata o momento preto de 20.000 visitantes. A retrospectiva rende homenaxe a unha figura esencial da pintura galega, que aos 93 anos continúa en activo, e permite achegarse á súa obra desde unha visión sinestésica: Úbeda é quen de percibir cores nos ritmos e ritmo nas cores, o que explica a relevancia da música na súa produción artística.
O concerto terá lugar na propia sala onde se exhiben as pezas, co obxectivo de crear unha atmosfera inmersiva na que pintura e música se fundan. O ensemble da Fundación Rogelio Groba interpretará obras de Dmitri Shostakóvich, un dos compositores que máis inspirou ao artista, así como pezas do propio Rogelio Groba Groba, considerado unha das figuras destacadas da composición galega do último século.
A exposición poderá visitarse ata o domingo 7 de setembro, un día despois do concerto, pechando así un ciclo no que a obra de Úbeda foi protagonista do Gaiás durante máis de catro meses.
