O venres 5 de setembro de 2025 ás 23:59 conclúe o prazo para inscribirse na décimo cuarta edición do Premio Auditorio de Galicia para Artistas Noveis, impulsado pola Concellaría de Capital Cultural co obxectivo de apoiar a creación emerxente, favorecer o talento galego e difundir a arte contemporánea no ámbito autonómico. A iniciativa está dirixida a persoas menores de 40 anos (até o 31 de decembro de 2025) nadas ou residentes en Galicia e cunha traxectoria aínda non consolidada; pódese participar en solitario ou en colectivo, sempre que todas as persoas cumpran os requisitos.
A convocatoria admite unha única proposta por participante, inédita e orixinal, en calquera técnica ou soporte: pintura, escultura, fotografía, vídeo, instalación, entre outras. O xurado, integrado por profesionais de prestixio no eido da arte contemporánea, seleccionará as finalistas e outorgará tres galardóns: primeiro premio de 6.000 euros, segundo de 3.000 euros e terceiro de 2.000 euros. Nesta edición forman parte do tribunal Susana Cendán Caaveiro (Universidade de Vigo, curadora independente), Rosendo Cid (artista, curador e escritor), Susana González (Fundación María José Jove) e Juan Luis Toboso Galindo (investigador, docente e curador), ademais dunha representación da Concellaría de Capital Cultural e doutra da dirección-xerencia do Auditorio de Galicia, que actuará como secretaría con voz e sen voto.
Entre os criterios de valoración figuran a innovación e a contribución á escena actual, a calidade artística, a claridade das explicacións e a coherencia do discurso conceptual, así como a viabilidade e adecuación aos recursos da institución. As obras finalistas integrarán unha exposición colectiva nas instalacións do ‘Auditorio de Galicia’ no último trimestre de 2025, e figurarán no catálogo da mostra.
A presentación de solicitudes realizarase exclusivamente pola sede electrónica do Auditorio de Galicia. Non se admitirán propostas fóra de prazo nin por outras vías. Para dúbidas ou información adicional están dispoñibles a web de Compostela Cultura, o correo exposicions@auditoriodegalicia.org e o teléfono 981 552 290.
