O Espazo Apego de Santiago inicia en setembro un novo curso de actividades dirixidas á infancia e ás familias, cun programa que combina xogo, creatividade e cultura para favorecer a socialización en galego.
A programación semanal abrangue diferentes propostas. Os luns, baixo o título A lingua medra, haberá sesións arredor do xogo, a ciencia, a psicomotricidade e a cociña, entre as 17:00 e as 19:00, para nenos e nenas de 2 a 6 anos. En setembro destacan dúas citas do espazo Merendolas: a primeira o día 1, cunha actividade de elaboración de animaliños con uvas e mazás, e a segunda o día 29, con tartaletas de verduras de tempada.
Os martes chegan as Tardes de contos, cun dobre horario segundo as idades: de 17:00 a 18:00 para 0-3 anos e de 18:15 a 19:15 para 3-6 anos. A actividade desenvolverase arredor dun tema mensual e fomenta a aprendizaxe de vocabulario a través da narración.
Os mércores será a quenda de Enredando e lingoretando, con xogos libres ou guiados que buscan fortalecer a socialización en galego. Haberá dous grupos, un para 3-6 anos sen acompañamento dunha persoa adulta e outro para 0-3 con acompañamento, ambos en horario de 17:00 a 19:00.
Ademais, dous xoves ao mes prográmase Tachán!, con espectáculos infantís. O día 11 de setembro Marta Ortiz e Brais das Hortas presentarán Onde nace a lingua (para 2-6 anos), unha proposta que combina narración, xogos fonéticos, cantos e explicacións filolóxicas. O día 25 será a quenda de Sole Felloza con Contiños e xogos de Lup (para 0-4 anos), centrado en contos, trabalinguas e xogos de proximidade.
Todas as actividades requiren inscrición previa mediante formulario en liña, e as prazas confírmase por correo electrónico unha vez rematado o prazo.
