A Deputación da Coruña deu a coñecer hoxe en Santiago a programación do Outono das Artes, un ciclo que se estenderá de setembro a decembro e que levará preto de cen propostas culturais a concellos de toda a provincia. A presentación contou coa deputada de Cultura, Natividade González, e coa alcaldesa de Compostela, Goretti Sanmartín, ademais das compañías e artistas participantes.
González subliñou que a iniciativa busca “reforzar o compromiso coa cultura como un dereito” e chegar “a todas as persoas, sen importar o tamaño dos concellos”. O programa inclúe 33 concertos, 31 representacións teatrais, 8 espectáculos de danza e 26 proxeccións audiovisuais, cunha oferta diversa pensada para diferentes públicos.
En Compostela, a primeira cita será o sábado 6 de setembro ás 21:00 no Campo de Conxo, cun concerto do grupo De Ninghures, que tamén servirá de peche ás conmemoracións polo centenario da anexión do antigo concello de Conxo a Santiago. Sanmartín destacou que o outono é “un momento de efervescencia cultural” na cidade, no que “o regreso do estudantado e o reencontro da veciñanza converten Compostela nun espazo especialmente vivo”.
A alcaldesa sinalou tamén a importancia da descentralización: “Non sempre pedimos que veñan a Compostela para ver espectáculos, senón que tamén queremos animar a que se acuda a outras vilas e que haxa vida nos barrios”. O propio concerto inaugural en Conxo responde a esa idea de levar cultura a diferentes espazos da cidade.
No acto interviñeron tamén representantes das compañías participantes. Arraianos Producións presentou un documental arredor da figura de Prisciliano; Producións Excéntricas anunciou a xira da obra Desterradas, dirixida por Kiko Cadaval; o Memorial Mireia Dieste avanzou catro concertos centrados en compositoras galegas para piano; Morra o Conto expuxo a peza Tromsø, unha viaxe escénica “en clave de humor sobre a perda”, e o Laboratorio Escénico anunciou o espectáculo Blues de Medianoite.
Tamén participaron Os Náufragos Teatro, que levarán ás táboas Bulebule, unha obra infantil sobre a muller no mar e o TDAH; Pérez & Fernández, con Nanai da China, recoñecida nos premios María Casares; a asociación Donaire, que celebra o seu 25 aniversario con música e baile tradicional, e a cantante Uxía, que continuará a súa xira Será por flores, unha retrospectiva polos seus 40 anos de carreira.
A programación completa do ciclo pode consultarse nas canles da Deputación da Coruña e inclúe citas en Santiago, Ferrol, Ribeira, Negreira, Betanzos, Muros, Teo, Oroso e outros puntos da provincia. O obxectivo, segundo a deputada González, é “facer da cultura unha ferramenta de cohesión social, de participación cidadá e de orgullo do noso patrimonio artístico”.
