A produtora compostelá Work on Sunday presentará entre o 11 e o 14 de setembro o proxecto ‘Amplificando a memoria’, unha proposta de investigación e creación sonora arredor do Organsound, altofalante fabricado en Santiago en 1972 polos irmáns Portela Seijo e inspirado na potencia acústica dos órganos de tubos. A iniciativa desenvolverase na Sede Afundación en paralelo ao WOS Festival x SON Estrella Galicia.
O proxecto está dirixido por Acacia Ojea, quen explicou que a proposta pretende “facer audibles as historias, os sons e as emocións que nos conectan como sociedade e situar ás novas xeracións no centro da preservación e actualización do noso acervo cultural”. Segundo a directora, “amplificar non só alude ao dispositivo técnico, senón tamén á acción simbólica de ampliar a nosa capacidade de escoitar, lembrar, sentir e comprender”.
Amplificando a memoria articúlase en tres piares: unha instalación sonora creada polo artista galego Xoán-Xil López, un panel de pensamento sobre o papel do Organsound no patrimonio sonoro e na innovación acústica, e unha serie de sesións de escoita colectiva comisariadas por selectores locais e internacionais.
A proposta busca integrar arte, tecnoloxía, educación e reflexión social, explorando o valor dun obxecto que simboliza unha forma de escoitar máis vinculada ao corpo, ao espazo e ao momento. “Vivimos nun tempo de hiperestimulación constante, no que a escoita atenta está cada vez menos presente. Recuperar o Organsound permitiunos reflexionar sobre como activar a memoria e a emoción de maneira compartida”, subliñou Ojea.
O proxecto conta co apoio da Deputación da Coruña, a través da Área de Cultura, do Concello de Santiago, da Universidade de Santiago de Compostela e de Afundación. O público poderá coñecelo a partir do xoves 11 de setembro en Compostela.
