O trío The GET, con sede en Nova Orleáns e raíces latinas, ofrecerá o seu primeiro concerto en Galicia o 17 de setembro en Santiago de Compostela. A actuación terá lugar no marco do HolaNolaFest, no bar Borriquita de Belém (Rúa de San Paio de Antealtares, 22), con apertura de portas ás 20:30 e inicio ás 21:00. A entrada será de balde.
A banda, integrada por George Elizondo (voz e guitarra), Chris Beroes-Haigis (violonchelo e efectos) e Vivi del Río (voz, teclados e sintetizadores), chega a Compostela despois de catro citas en Madrid, pechando así a súa primeira xira en España. O concerto permitirá coñecer a súa proposta sonora, definida como unha combinación de folk, art rock, post-punk e electrónica, con letras en inglés e español.
Recoñecidos coa Artist Residency 2024/25 do Material Institute de Nova Orleáns, The GET ten en marcha o seu primeiro álbum, titulado El Paraíso, que verá a luz a comezos de 2026. No repertorio que presentarán en Santiago destacan temas como ‘Del Viento’, ‘Get This’ ou ‘Canción Fantasma’, esta última cantada en español.
Segundo a prensa internacional, o grupo caracteriza o seu estilo por unir guitarras, violonchelo e teclados con bases electrónicas e voces cálidas. “Este trío de electro-folk afincado en Nova Orleáns sabe realmente como crear algo especial. O seu son resulta á vez fresco e familiar, e semella unha viaxe suave a través de distintos paisaxes musicais”, recolleu a revista Bored City.
