O Centro Xove da Almáciga volverá ser o punto de partida para dar visibilidade ao talento musical local coa celebración da cuarta edición do Festival Lanzadeira, que terá lugar o venres 22 de agosto na Praza 8 de marzo. A cita, con entrada libre, comezará ás 19:30 e reunirá catro propostas musicais de estilos diversos.
O cartel desta edición está composto polo country de Patrik, o punk de Chiskeiro, o rock alternativo de Ginko Biloba e o folk tribal de Zeltia Irevire, que será a encargada de pechar o evento. Moitos destes grupos e artistas xa tiveron presenza en espazos significativos da cidade, como o Banquete de Conxo, as festas do barrio de San Pedro ou os concertos de Galeras nas festas do Apóstolo.
O festival Lanzadeira constitúe unha plataforma de visibilidade e aprendizaxe para as bandas que ensaian nos locais municipais do Centro Xove, ofrecendo un escenario profesional con son, montaxe e iluminación avanzados. O obxectivo é reforzar o proceso formativo destes proxectos musicais e apoiar a súa profesionalización, favorecendo que a mocidade compostelá dispoña de oportunidades reais para mostrar o seu traballo en directo.
Deste xeito, Santiago acollerá unha nova edición dun festival que xa se consolidou como espazo de encontro entre a creación xuvenil e o público, contribuíndo á dinamización cultural da cidade.
