O Concello de Santiago de Compostela vén de anunciar unha nova campaña institucional centrada na visibilización da diversidade sexual e de xénero, que se desenvolverá ao longo de todo o mes de xuño con motivo do Orgullo LGBT+. A presentación tivo lugar este luns nunha rolda de prensa na que participaron a alcaldesa, Goretti Sanmartín, e a responsable do Centro de Información ás Mulleres (CIM), Teresa Furelos.
A rexedora compostelá destacou que se trata dunha acción conxunta de celebración e reivindicación: “Queremos poñer en valor que todas as persoas somos diferentes, e que iso é unha riqueza, non un problema”, sinalou. A campaña pretende concienciar sobre o dereito a vivir sen discriminación nin violencia, tanto pola orientación sexual como pola identidade de xénero.
A programación, promovida desde o CIM, inclúe propostas culturais, educativas e comunitarias que se espallarán por diferentes espazos da cidade. A alcaldesa insistiu en que o enfoque é transversal, implicando distintas áreas municipais co obxectivo de que Compostela avance como cidade libre de LGBTIfobia.
Sanmartín puxo tamén o foco na importancia de traballar desde a administración local para garantir a igualdade real e efectiva, e lembrou que esta campaña forma parte dunha estratexia máis ampla que o goberno local vén desenvolvendo en materia de dereitos civís. “Estamos falando de dereitos humanos. A diversidade é un valor que hai que defender todos os días, non só no mes de xuño”, apuntou.
A iniciativa municipal complétase coas actividades organizadas por asociacións como Avante LGBT+, que xa fixo pública a súa programación, e ás que o Concello expresou o seu apoio. A campaña institucional acompañará tamén a manifestación do 28 de xuño, que volverá saír da praza 8 de marzo, así como outras accións simbólicas que serán anunciadas nos vindeiros días.
