O Auditorio de Galicia acolleu este domingo a apertura do 18º Certame Municipal Intercentros de Danza, un encontro anual que reúne alumnado de distintos centros educativos de Santiago arredor desta disciplina artística. Na apertura institucional a alcaldesa compostelá, Goretti Sanmartín, puxo en valor o papel da danza como ferramenta de desenvolvemento persoal e colectivo.
Sanmartín subliñou que a práctica desta arte supón “superación persoal, esforzo e coñecemento do corpo, autoestima, orgullo e capacidade de traballo e equipo”. Ademais, fixo un chamamento a que esta disciplina continúe presente ao longo de toda a vida, máis alá das etapas escolares: “Hai destrezas que practicamos sempre, como a lectura, e outras que moitas veces se abandonan despois da infancia, como ocorre coa danza. Debemos romper con esa tendencia”.
O festival, organizado coa colaboración da Concellaría de Educación, que dirixe Míriam Louzao, reuniu nesta edición un total de 223 bailaríns e bailarinas pertencentes a oito centros educativos do municipio. A iniciativa forma parte da programación municipal de actividades escolares destinadas a promover a creatividade, a expresión corporal e a participación artística entre a mocidade.
