A Federación de Ateneos de Galicia reuniuse o pasado xoves 15 de maio en Santiago de Compostela nun encontro no que participaron representantes dos Ateneos de Santiago, Vigo, Pontevedra, Ferrol, Ourense e Moaña. O encontro serviu para ultimar os preparativos da homenaxe a Castelao, prevista para o 14 de xuño en Rianxo, así como para presentar un novo ciclo de conferencias que busca tender pontes entre cidades galegas.
A homenaxe a Castelao, encadrada nas celebracións do Ano Castelao, comezará cunha recepción oficial do alcalde de Rianxo ás entidades participantes. O programa inclúe unha visita guiada polos espazos vinculados ao autor en Rianxo, unha ofrenda floral diante da súa escultura, e un recital poético titulado ‘Castelao sempre’, no que participarán autoras e autores como Helena Villar Janeiro, Xesús Rábade Paredes, Xaime Toxo, Xabier Paz e Luísa Abad, entre outros. O encontro pecharase cun xantar de confraternidade, unha foliada con música tradicional galega e un cántico colectivo da ‘Rianxeira’.
A xuntanza da Federación tamén serviu para presentar o ciclo ‘Rompendo as barreiras do localismo’, co que se pretende promover o recoñecemento mutuo entre cidades galegas, combatendo visións de competencia e reivindicando as súas singularidades. A iniciativa comezará o 26 de maio nos Luns do Ateneo en Santiago, coa charla ‘Vigo en Santiago’, a cargo do escritor e editor Manuel Bragado. Continuará o 28 de maio en Pontevedra, con Xerardo Estévez, exalcalde compostelán, falando de ‘Santiago en Pontevedra’; o 3 de xuño en Vigo, con Bieito Iglesias abordando ‘Ourense en Vigo’; e o 6 de xuño en Ourense, onde o historiador Guillermo Llorca ofrecerá unha conferencia sobre ‘Ferrol en Ourense’.
A seguinte xuntanza da Federación de Ateneos de Galicia celebrarase na segunda quincena de setembro en Ourense, onde se retomarán as propostas de actividades debatidas neste encontro de Santiago. A entidade continúa así a súa aposta pola cooperación cultural e a interacción entre os diferentes Ateneos do país.
