Santiago de Compostela será un dos escenarios principais do festival de divulgación científica Pint of Science, que terá lugar os días 19, 20 e 21 de maio. O evento, que se celebrará en bares de toda España, busca achegar a ciencia á sociedade a través de charlas curtas e experimentacións prácticas. Neste contexto, a cidade acollerá un total de 12 charlas científicas no Café Bar Alborada de Veiga, cubrindo unha ampla variedade de temáticas, que van desde a biomedicina até o estudo do planeta Terra, pasando por disciplinas como a arqueoloxía ou a psicoloxía.
Entre os participantes destacados de Santiago nesta edición están Jorge Mira, que falará sobre o mellor momento para visitar a Costa da Morte para ver o último solpor de Europa continental; Antía Lestido, quen explicará os riscos invisibles nos alimentos, dende a seguridade dos envases ata os fraudes alimentarios, ou Zulema Varela, que nos amosará como elementos naturais tan comúns como árbores, liques ou plumas poden ser indicadores da contaminación ambiental na cidade.
O obxectivo do festival é establecer un diálogo directo entre a comunidade investigadora e a sociedade, permitindo que os científicos compartan o seu traballo dun xeito accesible e próximo. En palabras de Yeray Folgar Cameán, coordinador local do evento en Santiago, “a nosa intención é amosar a relevancia, o interese e a calidade da ciencia que se fai na nosa localidade, sempre cunha linguaxe clara e accesible”.
A edición de 2025 tamén trae novidades a nivel estatal, como o Pint Kids, que ofrecerá charlas e obradoiros para o público infantil e familiar, dispoñibles na web do festival. Ademais, o evento contará cunha exposición chamada Pintíficas, que estará presente nas estacións de tren de todo o país e amosará as achegas de científicas españolas ao campo da investigación, así como as dificultades que enfrontan as mulleres na ciencia.
A iniciativa conta co apoio de máis de 600 persoas voluntarias en todo o país, entre elas 11 en Santiago, e tamén co patrocinio de diversas entidades locais e nacionais que fan posible o evento. Esta décima edición será a máis ampla ata o de agora, con máis de 1.000 charlas en 75 localidades de toda España.
