A Biblioteca Ánxel Casal acolle desde o 2 até o 31 de maio a exposición ‘TintA: unha historia do fanzine libertario, de 1976 á actualidade’ organizada pola CNT Galiza. A exposición está na planta baixa, na hemeroteca e o horario de visita é o de apertura da biblioteca.
Esta exposición fai un percorrido pola cultura, que foi o mellor vehículo para o anarquismo de ofrecer a súa idea “dun mundo libre, xusto, carente de toda dominación e logrado a través da transformación social”. Con esta exposición móstrase un amplo abano de prácticas e actividades culturais coas que os anarquistas “non pretendían unicamente a difusión da Idea senón que, ao mesmo tempo, buscaban satisfacer o afán de coñecementos do proletariado e do campesiñado”.
Así naceron escolas racionalistas, Ateneos, asembleas, teatro, publicacións, grupos de lectura, as artes gráficas e conferencias. O desenvolvemento cultural do movemento libertario foi moi amplo “conformándose como un proxecto heteroxéneo, emancipador e con identidade propia”.
As publicacións escritas tiveron gran relevancia de aí que con grande traballo nacesen boletíns, panfletos, revistas ou xornais. Todas estas publicacións difundíronse rapidamente entre as capas sociais máis desfavorecidas.
O momento máis prolífico para estas publicacións anarquistas no estado español foi durante o período da Revolución Social, con publicacións que abordaban todo tipo de temáticas: xeografía, filosofía, historia, sexualidade ou pedagoxía. Coa perda da Guerra Civil e instaurada a ditadura franquista o número de publicacións descende drasticamente e a súa presenza vólvese testemuñal: “a prohibición, apoiada baixo unha cruenta represión e o medo imposibilitaba a edición e difusión de calquera idea non adepta ao réxime”.
Despois da morte de Franco as publicacións libertarias volven coller impulso. Coa chegada e boom do fanzine a finais dos setenta principios dos oitenta, dá comezo un novo período extraordinariamente fértil, no que o activismo anarquista atopa, na autonomía e liberdade que proporciona esta publicación artesanal, o medio perfecto para a difusión cultural e informativa dunha realidade alternativa en plena confrontación coa proporcionada desde a hexemonía dos mass-media e a cultura oficial.
A MOSTRA
TintA é unha mostra que se compón dunha pequena selección de fanzines de entre o que é unha infinidade de publicacións libertarias xurdidas desde finais dos setenta ata a actualidade. Cunha selección de artigos concretos, poderase acceder á realidade vivencial dun sindicato, dun ateneo, dunha asociación cultural, de individualidade para coñecer os seus puntos de vista, as súas opinións, as súas preocupacións e as súas loitas.
