O Teatro Principal de Santiago de Compostela converterase os días 8 e 9 de abril nun espazo de exhibición e encontro da danza contemporánea universitaria coa celebración da 23 edición do Encontro Universitario de Danza (EUD), unha iniciativa da Universidade de Santiago de Compostela (USC) que contará coa participación das tres universidades públicas galegas.
No marco da Primavera Cultural da USC, o EUD presentarase como un espazo para o intercambio artístico entre a Compañía de Danza da USC, a Aula de Danza da Universidade da Coruña e a Aula de Danza do Campus de Ourense da Universidade de Vigo, cun programa de entrada libre e gratuíta dirixido tanto á comunidade universitaria como ao público xeral.
A programación comezará o luns 8 de abril ás 20:30 horas, coa actuación da Universidade da Coruña, que estreará a peza hyphē, unha creación colectiva con mediación de Javier Martín. A continuación, será a quenda da Compañía de Danza da USC, que presentará REDes, unha montaxe que une aos grupos de danza dos campus de Santiago, Lugo e Sen Vergoña, baixo a dirección de Juan Carlos Zahera e coreografía de Rosa Acuña.
O martes 9 de abril, tamén ás 20:30, subirá ao escenario a Aula de Danza da Universidade de Vigo con Máis tarde, cá cedo, unha obra coreografada por Ainoa Linaza e dirixida por Nuria Sotelo. Pechará o encontro unha nova representación de REDes, completando así dous días de propostas coreográficas que reflicten o potencial creativo da mocidade universitaria galega.
A peza REDes destaca pola súa concepción colaborativa e o compromiso coa sustentabilidade, xa que o vestiario foi confeccionado con redes recicladas doadas por colectivos mariñeiros como as Redeiras de Aguiño e de Cangas do Morrazo. O traballo complétase cun audiovisual de Iria Estévez e poesía de Sabela Rodríguez, e conta cun elenco de dezaseis intérpretes que representan a diversidade de perfís presentes na vida universitaria.
O Espazo de Danza da USC, organizador do evento, naceu como un laboratorio pioneiro de danza contemporánea e ao longo de dúas décadas consolidouse como referente a nivel estatal, cunha traxectoria que inclúe máis de 300 representacións e 40 montaxes propias. O seu obxectivo é ofrecer un complemento formativo e cultural para o estudantado, así como abrir a universidade ao diálogo coa sociedade a través da creación artística.
