-
FESTAS E EVENTOS
Festa da Uña de San Lázaro: Do sábado 5 ao luns 7 de abril, o barrio de San Lázaro celebra unha das festas máis tradicionais da cidade, cun marcado carácter relixioso e gastronómico arredor das típicas uñas de porco. O sábado haberá alboradas, pasarrúas e sesión vermú co grupo Fussión, misa solemne ás 19:30 horas e verbena a cargo de París de Noia. O domingo continúan as misas desde as 9:00, procesión ás 12:30, nova sesión vermú e verbena coa formación Cayena. O luns terá lugar a tradicional subasta das uñas ás 11:35 horas, e pola noite actuará a orquestra Olympus tras a disco móbil. Todas as actividades son de balde e para todos os públicos.
-
MÚSICA
Festival Jaleo: O sábado 5 de abril, o Multiusos do Sar acollerá a primeira edición do Festival Jaleo, unha cita musical que reunirá a artistas de ámbito estatal e novos talentos. No cartel figuran nomes como Viva Suecia, Zahara, Sexy Zebras, Carlos Ares, Dani Dicostas e David Van Bylen. As entradas están dispoñibles dende 25 euros a través da plataforma Enterticket e o evento está dirixido a público adulto.
-
TEATRO E ESPECTÁCULOS
Tromsø: O venres 4 de abril, o Teatro Principal acollerá ás 20:30 horas a representación de ‘Tromsø’, unha obra da compañía Morraoconto recomendada para maiores de 16 anos. A peza propón unha reflexión en clave de humor sobre a perda, a memoria e a esperanza, a través dunha viaxe simbólica polos mares do norte. Conta con música en directo e incluirá unha posfunción ao remate da función. As entradas teñen un prezo de 12 euros e poden mercarse na web de Compostela Cultura ou na billeteira do teatro.
-
INFANTIL
Carapuchiña: O sábado 5 de abril ás 12:00 horas, a Biblioteca Pública Ánxel Casal acollerá o espectáculo ‘Carapuchiña’, da compañía Pedras de Cartón, dentro do ciclo polo Día da Literatura Infantil e Xuvenil. A obra, dirixida a público familiar, reinventa o conto clásico a través do teatro de obxectos e unha linguaxe case sen palabras, ambientada nunha panadaría tradicional. A función, protagonizada por Juan Rodríguez e Leonardo Casado, mestura elementos de varios contos populares. A entrada é de balde ata completar a capacidade do salón de actos.
-
DEPORTE
Os 10000 Peregrinos 10k: O sábado 5 de abril celebrarase en Santiago de Compostela a terceira edición desta proba de atletismo en ruta. O evento inclúe carreiras de 10 km, 5 km e 2 km, con saídas ás 18:00, 19:30 e 17:30 horas respectivamente, todas desde a rúa San Francisco e meta na Praza do Obradoiro. Tamén se realizará unha andaina de 4 km, que comezará ás 19:35 horas. As inscricións son de balde para todas as modalidades e poden realizarse a través da web oficial do evento.
