O Entroido de Santiago de Compostela deu comezo oficialmente onte co pregón de Alba Dosantos e Lucía Domínguez, que desde o balcón do Pazo de Bendaña encheron a cidade de sátira e humor, seguindo a tradición dos atranques dos xenerais da Ulla. Durante a intervención, as pregoeiras realizaron un percorrido pola actualidade política a través de coplas como: “Pediremoslle aos políticos, que garden as espadas, ao que remate o carnaval, xa volverán ás bofetadas”.
No pregón non faltaron referencias a temas locais como a AP-9, a actuación da Panorama no Obradoiro, a relación entre o presidente da Xunta e a alcaldesa, o comportamento dos peregrinos e as interaccións entre as formacións políticas municipais. O acto pechouse cos tradicionais vivas, destacando ao pobo valenciano, á corporación municipal, á veciñanza compostelá e ao propio Entroido de Santiago.
Ademais do pregón, quedou instalado no Pazo de Bendaña o Meco Enredando, unha figura inspirada na presenza das redes sociais na vida diaria, obra de José Manuel Méndez. O Meco chegou ao Toural acompañado por unha comitiva festiva na que participaron os Conformistas de Conxo, A Ruliña de Laraño, Os Armatroulas de Laraño e a charanga Os Chafalleiros.
PROGRAMACIÓN PARA ESTE DOMINGO
Hoxe, domingo 2 de marzo, a animación continuará dende as 10:30 horas coa comparsa Os Conformistas de Conxo e a Batucada do Bloco da escola de Latexo ás 13:00 horas. Pola tarde, a comparsa A Ruliña de Laraño e a charanga Tíralle do Aire percorrerán as rúas.
O evento central será o Festival Infantil de Disfraces na Sala Capitol, con presenza da alcaldesa Goretti Sanmartín e membros da Corporación municipal. O certame, de entrada libre, contará con baile, sorteo de agasallos e un concurso de disfraces en tres categorías: individual, parella e grupo. As inscricións estarán abertas de 16:30 a 17:45 horas.
