Compostela é coñecida como a cidade universitaria por excelencia. As súa rúas enchéronse, e seguen a facelo, cada xoves de centos de estudantes que saen para desfrutar da música, das conversas e da compañía dos amigos durante noites interminábeis. Esta tradición tén as súa raíces nas décadas dos 80 e 90, cando Santiago foi o epicentro dunha explosión cultural e nocturna chamada “a movida”. Durante aqueles anos, a cidade desenvolveu un carácter propio, con locais cheos de artistas, estudantes e veciños que se deixaban levar polo encanto da música en directo e da festa. Pero, que foi de todo ese ambiente? Qué locais sobreviven hoxe en día?
Na Zona Vella: memoria e resistencia
Na Zona Vella de Santiago, rúas como a Rúa do Franco, a Rúa de San Pedro ou a Rúa Nova eran escenarios principais daquela época dourada. Alí atopábanse locais míticos como O Patata, O Sótano, A Esquina ou O Cafetín, cada un cunha personalidade propia e unha clientela fiel que os convertía en centros de vida social e cultural.
Entre todos estes, algúns locais seguen a estar activos e forman parte do legado daquela época. O Modus Vivendi, por exemplo, mantén as súa portas abertas dende a súa inauguración no 1972. Non só é o pub máis antigo de Santiago, senón de toda Galicia, e segue a ser un punto de encontro para diferentes xeracións. Outro exemplo destacado é o Tarasca, un local que soubo reinventarse e onde os máis novos bailan ao ritmo de pop español ata altas horas da madrugada. A Casa das Crechas tamén destaca por seguir mantendo a súa venta aberta para atraer aos peregrinos ao son do folk galego.
Na Zona Nova: a modernidade e a nostalxia
Na Zona Nova, as discotecas eran as protagonistas. Espazos como o Número K, La Bolera ou a discoteca do hotel Araguaney destacaban pola súa modernidade e capacidade para acoller a un gran público. Eran o destino predilecto para aqueles que buscaban unha experiencia nocturna diferente e máis sofisticada.
Con todo, algúns destes espazos conseguiron adaptarse aos tempos e seguen a formar parte da vida nocturna compostelá. A antiga Liberty, por exemplo, pasou a ser o Circus, tras unha etapa intermedia como Facultad. Outro caso é o de Apolo, que actualmente é Vanitas, un dos locais con máis éxito da cidade hoxe en día.
O que queda da movida
Daquela movida, hoxe en día non queda máis que algún vestixio nos locais que soportan os cambios e o paso dos anos. Mais, a festa e as noites de esmorga seguen a estar presentes cada semana polas rúas de Compostela.
E ti, recordas algún destes locais?
