O próximo luns, 16 de decembro, o Ateneo de Santiago celebrará no salón de actos da súa sede na Rúa do Vilar, 19, a entrega do Premio Alfredo Vicenti de Xornalismo Cívico 2024. O galardón recaeu nesta edición na xornalista Marta Otero Mayán pola súa reportaxe ‘Somos las esclavas de este siglo’, publicada o pasado 3 de marzo en La Opinión de A Coruña.
O traballo premiado aborda as difíciles condicións das mulleres migrantes que desenvolven labores de coidado e limpeza, enfrontándose a explotación e precariedade laboral. A reportaxe destaca pola súa capacidade para sensibilizar sobre unha realidade social de grande impacto e pola súa calidade xornalística.
Durante o acto, o Ateneo entregará tamén unha mención honorífica ao xornalista Ángel Paniagua Pérez polo artigo ‘El “chemsex” dispara las infecciones sexuales’, publicado o 26 de novembro de 2023 en La Voz de Galicia. Este traballo pon o foco nun fenómeno emerxente que preocupa polos seus efectos sobre a saúde pública.
O fallo do xurado foi anunciado o pasado 20 de novembro, coincidindo co aniversario do nacemento de Alfredo Vicenti, recoñecido xornalista galego e defensor dun xornalismo ético e comprometido. O xurado estivo composto por representantes do Ateneo de Santiago, a Federación de Ateneos de Galicia e a Facultade de Xornalismo da USC.
O Premio Alfredo Vicenti busca recoñecer traballos que promovan valores cívicos e visibilicen cuestións sociais de relevancia. Con esta iniciativa, o Ateneo de Santiago reafirma o seu compromiso coa defensa dun xornalismo que contribúa ao cambio social e á reflexión colectiva.
