Este martes, 3 de decembro, ás 19:00, o Museo do Pobo Galego inaugurará a exposición ’75 cabodano da sinatura d’As cruces de pedra na Galiza, que rende tributo ao escritor e político Castelao con motivo dos 75 anos da publicación da súa derradeira obra. A mostra poderá visitarse ata o 29 de decembro de 2024.

A exposición inclúe unha selección de fondos propios do museo e obras cedidas por persoas socias e patróns. A través desta compilación, os visitantes poderán explorar o impacto e a evolución dos estudos sobre as cruces de pedra, que Castelao abordou como símbolo da relixiosidade popular galega. Nos últimos 75 anos, a súa obra inspirou numerosas investigacións tanto en Galicia como noutras fisterras atlánticas de Europa.

Organizada e producida polo Museo do Pobo Galego, a mostra conta co deseño gráfico e rotulación de Juan Feáns. Ademais, foi posible grazas á colaboración de diversas institucións: a Xunta de Galicia, a Deputación da Coruña, a Vicepresidencia da Deputación de Lugo – Área de Cultura, a Rede Museística Provincial de Lugo – Museo Provincial de Lugo e o Concello de Santiago de Compostela.

UN TRIBUTO A CASTELAO E A SÚA DERRADEIRA OBRA

Publicado por primeira vez en 1949, As cruces de pedra na Galiza reflicte anos de traballo e estudo de Castelao, quen asinou os primeiros pregos da obra desde o seu leito de morte en Arxentina. Esta exposición conmemorativa destaca a relevancia do polígrafo rianxeiro na preservación e divulgación do patrimonio cultural galego, representado a través das cruces de pedra como símbolo identitario.