A Igrexa de Santo Agostiño acollerá o próximo xoves, ás 20:00 horas, un concerto de cámara benéfico organizado por SanArte para recadar fondos destinados aos afectados pola DINA en Valencia. A iniciativa, que se enmarca no proxecto social de ConcertArt, conta cun equipo de oito músicos e unha actriz, ademais de artistas convidados, que colaboran neste concerto cuxos beneficios serán doados á Cruz Vermella.
SanArte, que naceu en 2016 como un proxecto de voluntariado no Hospital Clínico de Santiago, organiza este evento como mostra do seu compromiso solidario, afirmando que “o obxectivo é poder contribuír a unha causa humanitaria e dar apoio ás vítimas da DINA”, sinalou a organización. Este colectivo vén realizando actuacións para pacientes da Aula de Pediatría, unha actividade que describen como “unha experiencia que arrinca sorrisos en momentos difíciles”.
O programa musical inclúe obras de compositores como W.A. Mozart, G. Puccini, P. Casals, F. Farkas e X. Montes, interpretadas por diferentes agrupacións de corda e vento. Os interesados en asistir ao concerto poden adquirir as entradas de forma anticipada a través da web ou na porta o mesmo día do evento, cun sistema de pagamento mediante un código QR.
Ata o momento, o concerto conseguiu recadar 260 euros en tres días, grazas á achega de dez persoas. SanArte agarda incrementar esta cifra para enviar unha axuda máis ampla ás persoas afectadas, promovendo tamén a participación cidadá nesta causa solidaria.
