O conselleiro de Cultura, Lingua e Xuventude, José López Campos, xunto ao director xeral de Cultura, Anxo M. Lorenzo, inaugurou esta tarde na Biblioteca de Galicia a exposición Do soño á apocalipse. Os vieiros da literatura fantástica en galego, un percorrido pola literatura fantástica galega e a súa interconexión co panorama internacional. A mostra, enmarcada na programación do Día das Bibliotecas, exhibe máis de 100 pezas bibliográficas, manuscritos e ilustracións que destacan o papel de Galicia como berce de lendas e creacións literarias de fantasía, segundo indicou López Campos, quen lembrou a riqueza cultural galega como “terra de lendas e tradicións”.
A exposición ofrece un amplo percorrido que abarca autores clásicos galegos como Vicente Risco, Castelao, Ánxel Fole, ou Cunqueiro, quen puxeron as bases para este xénero en galego. Seguen obras de autores como Manuel Rivas, Agustín Fernández Paz e Suso de Toro, que renovaron o xénero nos anos posteriores á ditadura, e tamén se inclúen creacións contemporáneas de escritoras como María Reimóndez, Patricia A. Janeiro e Lara Dopazo. Destaca tamén a presenza de Boadicea Editora, unha editorial actual dedicada exclusivamente á literatura fantástica en galego.
Na vertente internacional, a exposición permite unha inmersión en obras de autores recoñecidos como J.R.R. Tolkien, Ursula K. Le Guin, Mary Shelley, Shirley Jackson, Edgar Allan Poe e H.P. Lovecraft. As ilustracións de Iago Torres París completan o contido, con capas e arte de edicións de literatura fantástica galega publicadas por editoriais como Contos Estraños e Galaxia.
A mostra estará aberta ao público ata maio e afonda en catro temas principais: a tradición popular galega, a fantasía, a ciencia ficción e o terror.
