O FacomFest, festival de contidos audiovisuais organizado polo alumnado de cuarto curso do grao en Comunicación Audiovisual da USC, celebrará a súa terceira edición entre o 25 e o 28 de novembro en Santiago de Compostela. Esta iniciativa, que conta co apoio da Vicerreitoría de Estudantes e Cultura, ten como obxectivo ofrecer un espazo de encontro para que a comunidade estudantil galega poida compartir e exhibir as súas creacións audiovisuais, promovendo así o talento da xuventude en Galicia.
A participación no festival está aberta a estudantes matriculados en calquera universidade ou centro de formación galego, independentemente dos seus estudos. As obras poden presentarse en dúas modalidades: unha sección competitiva, con tres categorías (Ficción, Non Ficción e Videoclips), na que as obras premiadas recibirán unha compensación económica; e unha sección non competitiva, orientada exclusivamente á exhibición de contidos.
As inscricións están abertas ata o próximo 5 de novembro e pódense realizar a través dun formulario dispoñible nas redes sociais do festival e na súa páxina web. As obras da sección competitiva serán avaliadas por un xurado composto por estudantes e profesionais do sector audiovisual.
O programa do Faco Fest incluirá, ademais das proxeccións das obras seleccionadas, actividades formativas e eventos musicais, seguindo a dinámica das edicións anteriores. Esta oferta complementarase con talleres e outras actividades deseñadas para promover o intercambio de experiencias e aprendizaxe no ámbito audiovisual.
