Este sábado 19 de outubro, ás 19:00 horas, o Auditorio de Galicia será o escenario da estrea estatal de As bruxas de Salem, unha produción do Teatro Nacional São João de Porto dirixida por Nuno Cardoso a partir do texto orixinal de Arthur Miller. A representación forma parte da colaboración entre o Centro Dramático Galego, o Concello de Santiago de Compostela e a escena teatral lusa, dentro da programación cultural Quintas do Camões.
Na presentación, o director do Centro Dramático Galego, Fran Núñez, destacou o impulso ás coproducións entre Galicia e Portugal nos últimos anos. Nuno Cardoso explicou que a obra de Arthur Miller reflicte a paranoia social e política, tanto no contexto dos xuízos de Salem de 1692 como na persecución anticomunista do macarthismo nos anos 50.
O elenco conta con destacados actores como Ana Brandão e Jorge Mota, e a obra, que se representará en portugués con sobretítulos, ten unha duración de 155 minutos. As entradas están á venda a través das canles habituais de Compostela Cultura.
