O Concello de Santiago de Compostela organiza a primeira edición de ‘Encantos en Compostela‘, un festival de maxia que terá lugar entre os días 18 e 20 de outubro e ofrecerá máis de 20 actividades gratuítas. O obxectivo é achegar o ilusionismo a todos os recunchos do municipio, incluíndo diversas parroquias rurais e espazos do centro urbano.
O festival contará coa participación de recoñecidos magos, entre eles Xulio Merino, O Mago Paco, Sara Rodríguez e Óscar Fernández, que levarán a cabo espectáculos e obradoiros para público de todas as idades, con sesións tanto de mañá como de tarde e noite. Os espectáculos, de carácter familiar e participativo, abranguerán dende pases solidarios en residencias de maiores e hospitais, ata sesións de maxia de preto para adultos en pequenos grupos.
Os organizadores, a compañía Magia en la Manga, destacaron a importancia de levar a maxia a todos os recunchos da bisbarra, co fin de facer accesible esta arte a públicos diversos. As actividades chegarán a parroquias como San Lázaro, Laraño, Busto, Lavacolla, O Romaño, San Lourenzo, Marrozos, Conxo e Carballal, amais de espazos urbanos, centros socioculturais e locais comerciais que colaboran co evento.
Toda a información sobre o festival, incluíndo o programa completo e a posibilidade de reservar praza para as actividades de maxia de preto, está dispoñible na páxina web oficial encantosencompostela.com.
