Entre os días 2 e 4 de outubro, Santiago de Compostela acolle o Congreso Internacional Galaico-Lusitano de Historia da Medicina, un evento organizado pola Universidade, o Centro de Investigación Interuniversitario das Paisaxes Atlánticas Culturais (CISPAC) e a Real Academia de Medicina de Galicia. O congreso reunirá expertos de Galicia e Portugal para analizar distintos aspectos da historia da medicina desde unha perspectiva internacional.
A apertura oficial terá lugar o 2 de outubro ás 18:00 horas no Salón Nobre do Colexio de Fonseca, coa conferencia inaugural a cargo da profesora Amélia Ricon-Ferraz, da Universidade do Porto, titulada ‘A evolução dos instrumentos cirúrgicos nas páginas dos catálogos de especialidade’. A asistencia ao acto será de acceso libre ata completar o aforo.
Os días 3 e 4 de outubro, as restantes sesións do congreso trasladaranse ao Auditorio Fontán da Cidade da Cultura de Galicia, onde se abordarán temas como a historia do Hospital Psiquiátrico de Conxo, as curacións relatadas nas Cantigas de Santa María de Afonso X o Sabio, a pandemia de gripe de 1918 e a cirurxía na Prehistoria.
Este congreso ofrece unha oportunidade única para reflexionar sobre os avances e retos da medicina ao longo da historia, co obxectivo de proporcionar unha visión máis ampla do desenvolvemento desta ciencia a través dos séculos.
