O Partido Popular de Santiago participou esta tarde na manifestación Mundial en apoio a Venezuela, que tivo lugar na Praza do Obradoiro, para esixir unha postura clara dos grupos municipais nacionalistas e socialistas ante a situación que vive o país sudamericano. Durante o acto, o PP instou a BNG, Compostela Aberta e PSOE a condenar a situación política en Venezuela, calificándoa de ditadura. “Tanto o BNG, como Compostela Aberta e o PSOE teñen que chamarlle ao que está a pasar en Venezuela polo seu nome: unha ditadura, a ditadura de Nicolás Maduro”, declararon fontes populares.
O portavoz popular, Adrián Villa, xa defendera esta postura no pasado Pleno municipal, onde instou aos grupos municipais a condenar o réxime de Maduro. Ademais, pediu que se axilizase a tramitación de medidas de atención social aos venezolanos que están chegando a Santiago, ante o aumento das solicitudes de axuda por parte deste colectivo.
A manifestación contou cunha ampla representación de veciños de Santiago, que quixeron visibilizar o apoio aos máis de 30.000 galegos e galegas que residen actualmente en Venezuela. Segundo o PP, a crise política e social que atravesa o país, agudizada tras o último proceso electoral de xullo, é unha “grave ameaza para a liberdade democrática”, un feito que consideran que debería recibir unha condena unánime dos partidos políticos en Santiago.
Durante a súa intervención, Villa cualificou de “covardes” aos nacionalistas pola súa decisión de non defender publicamente a súa postura durante a moción municipal, ao non participar activamente no debate sobre Venezuela. O PP reiterou a necesidade de que todas as forzas políticas se posicionen en favor da democracia e dos dereitos humanos no país latinoamericano.
