A Festa da Filloa de Lestedo, no concello de Boqueixón, foi oficialmente recoñecida como Festa de Interese Turístico Nacional. O alcalde de Boqueixón, Ovidio Rodeiro Tato, recolleu onte o diploma acreditativo de mans do ministro de Industria e Turismo, Jordi Hereu, nun acto celebrado no Teatro Real de Madrid, coincidindo coa conmemoración do Día Mundial do Turismo.
Ovidio Rodeiro destacou o traballo realizado polos veciños de Lestedo ao longo de máis de corenta anos, salientando que este recoñecemento supón un premio ao seu esforzo. “Os veciños e veciñas de Lestedo levan décadas traballando nesta celebración, e este diploma é o resultado do seu compromiso coa tradición”, afirmou o alcalde. Tamén expresou o seu agradecemento á Xunta de Galicia, especialmente á Dirección Xeral de Turismo, pola colaboración prestada nos últimos anos para acadar esta distinción.
A Festa da Filloa de Lestedo compartiu protagonismo na cerimonia con outras celebracións que tamén foron recoñecidas. Entre elas, destacou outra festa galega, a Festa da Empanada de Bandeira (Silleda), que tamén obtivo o título de Festa de Interese Turístico Nacional. Ademais, dúas festas galegas foron declaradas de Interese Turístico Internacional: a Festa da Lamprea de Arbo e o Arde Lucus.
O alcalde estivo acompañado na cerimonia por varios representantes do municipio e da Asociación Cultural da Filloa de Lestedo, entre eles Pascual Villaverde e Juan Corral, ademais do concelleiro de Industria, Turismo e Desenvolvemento Local, José Luís Mareque Simón, e o director de Competitividade de Turismo de Galicia, Iván Meléndez Medela.
Este recoñecemento sitúa a Festa da Filloa de Lestedo no panorama turístico nacional, destacando o seu valor cultural e a súa longa tradición popular.
