O grupo de investigación Iacobus da USC, en colaboración coa Asociación de Artesáns e Comerciantes Ourives de Compostela, organiza as I Xornadas de Pratería e Acibechería compostelás, que se desenvolverán entre os días 25 e 27 de setembro no Salón de Actos da Facultade de Filosofía da Universidade de Santiago de Compostela. A inscrición para participar nestas xornadas é de balde e pode realizarse enviando un correo ao enderezo xornadasdeprateria@gmail.com.
As xornadas enmárcanse dentro dos ‘Monográficos Iacobus’, un ciclo de seminarios que aborda temas de arte e patrimonio cultural galego, enfocándose nesta ocasión en dúas artes estreitamente vinculadas á historia de Compostela: a prata e o acibeche. A Ourivería e Acibechería de Santiago, que leva anos impulsando a investigación destas técnicas, participa activamente na organización deste evento, que pretende conectar a academia coa tradición artesanal da cidade.
O programa inclúe un total de dez conferencias, nas que intervirán expertos do grupo Iacobus e colaboradores como Ramón Yzquierdo Peiró, director do Museo da Catedral de Santiago, e investigadores como Diana Dúo Rámila, do Museo de Pontevedra. Entre os relatores figuran tamén profesores da USC como Mª Dolores Barral Rivadulla, David Chao Castro, Juan Manuel Monterroso Montero e Ana Pérez Varela, entre outros.
Ademais das conferencias, as xornadas ofrecerán actividades complementarias, como visitas guiadas ao Museo da Catedral de Santiago, ás exposicións ‘O legado Ángel’ no Colexio de Fonseca e ‘Las Edades del Hombre: Hospitalitas’ en San Martiño Pinario. Tamén se celebrará unha mesa-debate sobre o futuro da artesanía en Santiago, na que participarán Enrique Fink, de Ourives de Compostela; Elena Fabeiro, de Artesanía de Galicia, e Mónica Cao Pereira, de MOCAO Artesanía.
Outro dos atractivos será unha demostración en vivo de técnicas tradicionais de pratería e acibechería, que terá lugar na praza de Mazarelos e estará a cargo de artesáns da asociación.
Estas xornadas teñen como obxectivo investigar, coñecer e difundir unha arte milenaria que forma parte da identidade de Compostela e do Camiño de Santiago, promovendo a colaboración entre a universidade e o sector artesanal local.
