O Centro Social Polivalente de Brión será o escenario principal da sétima edición do Festival Brión Inclúe, que se celebrará do 21 ao 29 de setembro. Este evento, que busca a inclusión real das persoas con discapacidade como creadoras e consumidoras de cultura, terá unha ampla programación de actividades culturais, como música, teatro, maxia e contacontos.
O alcalde de Brión, Pablo Lago, destacou o crecemento do festival dende a súa creación no 2018, sinalando que “comezamos cun programa de tres días e agora quixemos ir máis aló, coincidindo coas festividades da Romaría de Santa Minia, para que esta oferta inclusiva chegue ao maior número de persoas”. Unha das actividades destacadas será a sesión vermú do domingo 29 de setembro, que formará parte da programación oficial da romaría e contará coa participación da tiktoker Leti da Taberna, a batukada inclusiva Iguatuke e o grupo de rock Chungo Pastel.
O festival, organizado polo Concello de Brión en colaboración con Culturactiva S. Coop. Galega e financiado pola Deputación da Coruña, busca visibilizar e normalizar a diversidade funcional a través da cultura, facendo fincapé no dereito de todas as persoas a crear e consumir cultura sen barreiras.
