A concelleira do Partido Popular de Santiago, Yolanda Otero, cargou contra o BNG por “esquecer” o eido do voluntariado no municipio. Segundo Otero, a formación nacionalista non conta cun Plan estratéxico de Voluntariado, non reactivou a Oficina Municipal de Voluntariado e non participa en programas europeos como o Corpo Europeo de Solidariedade ou o Programa de voluntariado xuvenil.
A edil popular destacou que levan meses reclamando a creación dun plan que poña en marcha a oficina como “referente e canle de información” para as entidades sociais e para aquelas persoas interesadas en colaborar en actividades de voluntariado. “O voluntariado é un activo intanxible de gran valor social para Santiago”, apuntou Otero, resaltando o papel fundamental que teñen as organizacións sociais no fortalecemento do tecido asociativo local.
Otero tamén criticou que o BNG non teña actualizado os datos de contacto do concello no portal galego de entidades de voluntariado, e subliñou a importancia de captar axudas europeas que permitan desenvolver proxectos solidarios en Santiago. “É esencial que as persoas voluntarias poidan adquirir habilidades e experiencias que melloren a súa empregabilidade e contribúan ao seu desenvolvemento persoal e profesional”, afirmou.
O Partido Popular insta ao goberno municipal a reactivar o voluntariado en Santiago, aproveitando todos os recursos dispoñibles, tanto locais como europeos, para fomentar a participación cidadá e a solidariedade na cidade.
