A directora da Axencia Galega de Innovación, Carmen Cotelo, participou hoxe no International Students Welcome Day organizado pola USC, onde se deu a benvida a preto de 400 estudantes de máis de 40 países. No acto, tamén estiveron presentes o reitor da USC, Antonio López, e outras autoridades académicas.
Carmen Cotelo aproveitou a ocasión para destacar as capacidades do ecosistema galego de I+D+i, subliñando o papel fundamental das universidades galegas como “o principal puntal” deste ámbito. A representante da Xunta destacou a aposta do goberno galego pola captación e retención de talento investigador e innovador en Galicia, explicando que “as persoas son o principal activo na I+D+i”.
Ademais, Cotelo salientou a importancia da diversidade, a internacionalización e a colaboración no avance do coñecemento, animando ao estudantado internacional da USC a actuar como embaixadores da “marca Galicia” nos seus países de orixe.
