O BNG de Ames presentou unha moción solicitando á Xunta de Galicia que estude a ampliación ou a construción dun novo Centro de Saúde e PAC en Bertamiráns, tras unha reunión coas traballadoras e persoal sindical do centro. O encontro, celebrado o 3 de xullo, contou tamén coa presenza da parlamentaria nacionalista Iria Carreira, quen recolleu as preocupacións do persoal sobre o estado das instalacións e a falta de persoal, que afecta negativamente á atención aos pacientes.
Na defensa da moción, a voceira do BNG de Ames, Escarlata Pampín, destacou que o edificio, construído en 1991, non responde ás necesidades actuais da poboación, que se triplicou dende entón. “Os investimentos foron insuficientes para un concello que medrou tanto”, afirmou Pampín, subliñando que o partido leva tempo loitando por melloras no centro de saúde.
O BNG propón que a ampliación ou construción do novo centro se faga sobre o terreo cedido polo Concello e que se dote ao centro de persoal adicional, garantindo atención pediátrica polas tardes, un dobre equipo médico nas fins de semana e novas especialidades como fisioterapia, radioloxía, nutrición e logopedia para responder ás necesidades da veciñanza de Ames.
A formación nacionalista comprometeuse a seguir traballando para que se leve a cabo o cumprimento desta moción, co obxectivo de mellorar a atención sanitaria no municipio.
