O Concello de Brión puxo fin hoxe ao seu programa de conciliación Concilia Verán 2024, que se desenvolveu desde o pasado 24 de xuño en horario de 8:00 a 15:00 horas. Segundo informou a concelleira de Ensino, Guarina Rey, nesta edición participaron 275 nenos e nenas de entre 3 e 16 anos, beneficiando así a un total de 216 familias do municipio, co obxectivo de facilitar a conciliación familiar durante as vacacións escolares.
Entre as actividades organizadas polas mañás incluíronse excursións ao Río Pego, saídas á praia de Broña, unha visita ao Gaiás e espectáculos como o musical “Brinca vai!: de aquí acolá“. Ademais, o programa contou con dous campamentos de pernocta celebrados no Convento de Herbón (Padrón), un para nenos de 8 a 12 anos en xullo e outro para rapaces de 13 a 16 anos en agosto.
O Concilia Verán 2024 foi organizado polo Concello de Brión co apoio da Consellería de Promoción do Emprego e Igualdade e o Ministerio de Igualdade a través do Plan Corresponsables.
