Preto de 550 persoas participaron esta fin de semana na Festa dos Maiores organizada polo Concello de Brión no polideportivo municipal. O evento foi presidido polo alcalde, Pablo Lago Sanmartín, quen estivo acompañado polos concelleiros de Maiores, Rosa Romero; Cultura, Sandy Cebral, e Medio Rural, José Antonio Vidal.
Durante o acto, o alcalde comprometeuse a seguir mellorando esta celebración, que definiu como “unha das datas máis importantes do ano” para o concello. Ademais, animou aos maiores a participar nas actividades que se desenvolverán no centro social polivalente a partir do 1 de outubro, como baile, piscina, ximnasia e grupo de teatro.
A xornada de confraternización incluíu unha comida con empanada, polbo e carne ao caldeiro, seguida dun animado baile coa actuación da cantante local Ruth Cundíns e do grupo de gaitas Xoldra de Rois.
