O BNG de Ames presentou unha moción na que insta á Xunta de Galicia a estudar a construción dun novo centro de saúde ou a ampliación do actual en Bertamiráns, co fin de adaptalo ao crecemento poboacional e mellorar a calidade da atención sanitaria. Inaugurado en 1991, cando a poboación era de 10.000 habitantes, o centro dá servizo hoxe a máis de 33.000 persoas, o que xerou unha situación de sobrecarga nas consultas e insuficiencia nas infraestruturas.
O persoal sanitario e sindical destacou que o edificio está obsoleto e non responde ás necesidades actuais, a pesar dunha remodelación parcial realizada hai tres anos. Entre as demandas do BNG, inclúese a dotación de máis persoal, atención pediátrica pola tarde e a creación dun dobre equipo no PAC para cubrir as tardes e fins de semana. Tamén solicitan a inclusión de novas categorías profesionais, como fisioterapia, radioloxía e nutrición.
O BNG amósase satisfeito de que, tras a presentación da moción, o alcalde de Ames solicitara unha reunión co conselleiro de Sanidade, Antonio Gómez Caamaño, para abordar estas cuestións.
