A concelleira do Partido Popular de Santiago, Nerea Barcia, acusou ao BNG de falta de planificación nas tarefas de desbroce en varias zonas do concello. Barcia afirmou que “os nacionalistas non teñen nin calendario, nin plan de traballo”, en referencia ao estado de abandono de fincas municipais, como a do Campiño de Guadalupe, que visitou esta semana xunto ao líder do PP compostelán, Borja Verea.
Barcia destacou que, a pesar das queixas da veciñanza e da presentación de varias reclamacións no Concello, “non se tiña feito nada ata hoxe, venres 6 de setembro”. Criticou tamén que o BNG só actúa despois de que o PP denuncie os problemas. Segundo a edil popular, esta situación repítese constantemente, e afirmou que “é unha vergoña que teña que ser o PP de Santiago o que lles marque a folla de ruta”.
A situación no Campiño de Guadalupe foi denunciada nun pleno anterior, onde os populares solicitaron a limpeza da zona debido a que a maleza invadía parte da estrada, afectando a visibilidade e a seguridade viaria. Barcia lamentou que o traballo de roza non se realizase ata setembro, a pesar do compromiso do BNG de actuar con rapidez.
