Este sábado, 7 de setembro, o pavillón municipal de Bertamiráns converterase no epicentro do fútbol sala galego coa celebración do primeiro derbi galego da máxima categoría nacional entre o Noia Portus Apostoli e o Pescados Rubén Burela. O partido, organizado polo Fútbol Club Meigas en colaboración co Concello de Ames, comezará ás 19:00 horas e será unha cita inédita, xa que é a primeira vez que estes dous equipos se enfrontan na primeira división do fútbol sala masculino.
O Noia Portus Apostoli afronta a súa terceira tempada consecutiva na máxima categoría, mentres que o Pescados Rubén Burela regresa tras o ascenso conseguido a tempada pasada. Este partido non só será un duelo entre os dous únicos equipos galegos da primeira división, senón tamén unha oportunidade para promover o fútbol sala na comarca.
A concelleira de Deportes de Ames, Susana Señorís, animou á veciñanza a asistir ao encontro, destacando que será unha oportunidade para “gozar do mellor fútbol sala masculino galego“. Pola súa parte, a presidenta do FC Meigas, Paola Vignolo, explicou que o obxectivo do partido é “promocionar o fútbol sala en Ames” e dar visibilidade a este deporte, aproveitando o éxito do equipo feminino do club, que compite na segunda división nacional.
Ademais, o FC Meigas, tras gañar a súa eliminatoria na Copa Galicia, enfrontarase o 1 de outubro ao Pescados Rubén Burela FS en cuartos de final, nunha cita histórica para o equipo amesán que terá lugar tamén no pavillón de Bertamiráns.
