Esta semana, a Facultade de Filosofía da USC é o escenario do seminario internacional “O Corpo Humano entre a Antigüidade e o Barroco: Ciencia, Arte e Pensamento”, que se celebra do 4 ao 6 de setembro. O evento busca explorar como evolucionou a visión do corpo humano ao longo da historia, abordando temas como a relación entre o corpo e a enfermidade na Galicia medieval, os mitos clásicos das amazonas ou a deshumanización das persoas escravas na antiga Roma.
O vicerreitor de Profesorado, Ernesto González Seoane, presidiu a inauguración do seminario, acompañado polo decano da Facultade de Filosofía, Xavier de Donato, quen destacou a riqueza temática do encontro. Tamén participaron a directora da Biblioteca Universitaria, María Isabel Reyes, e o coordinador do grupo de investigación Síncrisis, Pedro López-Barja.
Ademais das sesións académicas, o seminario complétase cunha exposición de libros antigos na Igrexa da Universidade, que estará aberta ata o 11 de setembro. A mostra inclúe valiosos exemplares de libros de anatomía e obras sobre o corpo humano da Biblioteca Xeral da USC, algúns datados de case catro séculos atrás. A través destas obras e de paneis ilustrativos, o público pode contemplar como se representaba graficamente o corpo en distintas épocas e culturas, co límite temporal do barroco.
O seminario, organizado por membros do Instituto de Humanidades da USC (iHUS), conta coa colaboración das facultades de Filosofía, Filoloxía e Xeografía e Historia e forma parte dun esforzo por estudar a evolución das concepcións sobre o corpo humano a través da ciencia, a arte e o pensamento.
