A Xunta de Goberno Local de Ames aprobou o 16 de agosto o expediente de licitación para as obras de pavimentación e mellora das sendas no lugar de Coira, na parroquia de Biduído. O proxecto ten un orzamento base de licitación de máis de 284.000 euros, IVE incluído.
O concelleiro de Obras e Servizos Básicos, Gustavo Nieto, afirmou que esta actuación responde a “unha necesidade moi importante que está en liña coas políticas desenvolvidas dende o inicio do mandato”. Segundo Nieto, o rural de Ames, que representou o 60% do orzamento dedicado a obras no último ano, recibe agora unha atención prioritaria.
Por outra banda, o alcalde Blas García explicou que a licitación actual é unha segunda oportunidade para resolver unha “débeda de anos anteriores cos veciños de Coira”. García destacou que a primeira empresa adxudicataria incumpriu o contrato, o que levou a reprogramar o proxecto e incluír os interiores de Coira, que inicialmente estaban fóra do alcance da obra.
O proxecto contempla a pavimentación dunha senda peonil de 530 metros de longo e 2 metros de ancho, que conectará os lugares de Ventín e Coira. Para isto, realizarase unha nova capa de rodaxe con mallazo, 10 cm de zahorra e 15 cm de formigón. Ademais, construirase un muro de bloques de granito de 60 metros de longo e 2 metros de alto para a contención de terras.
Previo á pavimentación, está previsto executar a canalización das redes de telefonía, baixa tensión e alumeado. Isto implicará o desmonte de postes, a apertura de zanxas e a instalación de novas arquetas e luminarias.
Finalmente, tamén se mellorará o firme no núcleo de Coira, aplicando unha capa de rodaxe con mallazo e 15 cm de formigón. Este tipo de intervencións foron realizadas recentemente en diferentes núcleos do rural de Ames como Gasamáns, Galiñeiro, Framil e Cortegada.
Segundo informou o consistorio municipal, o proxecto está financiado a través do plan provincial POS+2024, que busca impulsar a mellora das infraestruturas no ámbito rural.
