O Concello de Boqueixón está a realizar unhas obras de mellora na aldea de Lamas, que inclúen a renovación da capa de rodaxe da estrada de acceso, a demolición do antigo palco de música e o acondicionamento do campo da festa da parroquia. Estas actuacións contan cun investimento de 26.000 euros.
As obras comezaron a semana pasada coa demolición do antigo palco de música situado no campo da festa. “Ademais da demolición do palco, fíxose a canalización de pluviais e agora estamos aglomerando a zona”, explicou o alcalde de Boqueixón, Ovidio Rodeiro Tato. Estes traballos de aglomerado abranguen unha superficie de 1.050 metros cadrados no acceso ao campo da festa, onde tamén se realizou un ancheamento do espazo de 450 m², precedido do arranxo das fochancas existentes.
Ademais, acometerase a limpeza de gabias e salvagabias, así como o pintado das liñas de bordo e da sinalización horizontal na estrada de acceso. Segundo informou o alcalde, os traballos estarán rematados nos próximos días.
