O ciclo Atardecer no Gaiás, impulsado pola Xunta de Galicia a través da Fundación Cidade da Cultura, continúa en agosto con dez novas citas musicais que terán lugar os xoves e venres do mes. Esta semana, os asistentes poderán gozar das actuacións do influínte DJ e produtor portugués Branko e do grupo galego Amoebo. Os concertos, con entrada libre e gratuíta, serán ás 21:00 horas na Praza Central do Gaiás.
Branko subirá ao escenario o xoves 1 de agosto para presentar o seu disco Soma, no que colaboran algúns dos mellores artistas de Portugal, como Dino D’Santiago, Carla Prata, Jéssica Pina e Teresa Salgueiro, entre outros. O ex-fundador de Buraka Som Sistema propón doce temas de electrónica cálida e bailable, incluíndo colaboracións internacionais como a do rapeiro Jay Prince.
O venres 2 de agosto será a quenda de Amoebo, unha proposta de música urbana que mestura ritmos latinos e pop dos anos 80 para reinterpretar a verbena galega. As súas letras, que abordan temas como o amor, o sexo e a vida cotiá da mocidade, prometen non deixar a ninguén sentado.
NOVOS TALENTOS E DIVERSIDADE MUSICAL
A programación de agosto de Atardecer no Gaiás inclúe novos talentos como os galegos Alana, gañadores do certame Xuventude Crea 2023 na categoría de música; a manchega Bewis de la Rosa; o grupo catalán Faneka; os madrileños Carrera Blanca; e o dúo arxentino-malagueño Cosmic Wacho. O cartel combina estilos diversos como a electrónica, o folk, a cumbia urbana, o indie e o electropop, e complétase con artistas de longo percorrido como ALARIDO e Santi Araújo desde Galicia, e Rocío Saiz desde Madrid.
Este ciclo musical conta co apoio de Cervezas Alhambra e forma parte da campaña CulturON da Consellería de Cultura, Lingua e Xuventude, que promove máis de 30 actividades culturais diarias por toda Galicia.
