A Ruta Rosaliana-As Pegadas de Rosalía, que percorre os concellos de Ames, Brión, Dodro e Padrón, foi presentada oficialmente esta semana nun acto celebrado na Casa de Rosalía, no que estiveron presentes os alcaldes dos catro municipios. A ruta inaugurará o sábado 14 de setembro, con participación aberta a toda a persoa que o desexe.
Os alcaldes de Ames, Blas García; Brión, Pablo Lago; Dodro, Xabier Castro; e Padrón, Anxo Rey, asinaron esta mañá na sede da Fundación Rosalía o convenio polo que os catro concellos acordaron desenvolver e xestionar a Ruta Rosaliana-As Pegadas de Rosalía, un itinerario que percorre lugares intimamente vinculados á vida e á obra de Rosalía de Castro. Os rexedores déronlle o visto bo á creación dunha comisión mixta que xestionará a agrupación supramunicipal e todas aquelas iniciativas e actividades que desenvolva para conservar e promocionar esta ruta rosaliana e o patrimonio material e inmaterial da súa contorna.
Así mesmo, o acto serviu para presentar a primeira das actividades: a realización da ruta en autobús cunha visita guiada e teatralizada, prevista para o sábado 14 de setembro. As inscricións, gratuítas, abriranse do luns 26 de agosto ata o martes 10 de setembro en www.padronturismo.gal/inscricions, e as prazas para os dous autobuses dispoñibles (un que sairá de Dodro ás 9:30 e pasará por Padrón, e outro que sairá de Ames ás 9:30 para pasar despois por Brión e por Ames) serán adxudicadas por orde de inscrición. Ao remate da ruta, ao redor das sete da tarde, todas as persoas participantes e aquelas que queiran asistir ata completar o aforo poderán gozar dun concerto de Manoele de Felisa na igrexa de Santa María de Iria Flavia.
