O Concello de Boqueixón comezou recentemente as obras de mellora na aldea de Pazos, en Lestedo, co obxectivo principal de optimizar a canalización das augas pluviais e mellorar a capa de rodaxe dun dos viarios de acceso principais a esta aldea desde a estrada provincial DP-1202. O alcalde, Ovidio Rodeiro, destacou a importancia destas obras para “evitar inundacións e mellorar a conectividade na aldea”.
As obras inclúen a instalación de 105 metros de tubaxe de 400 mm de diámetro e outros 100 metros de tubaxe de 315 mm, así como a colocación de 4 pozos de rexistro e 6 arquetas con sumidoiro. Ademais, engadirase unha arqueta con reixa para reforzar o sistema de drenaxe.
Posteriormente, está previsto repor a capa de rodaxe cunha profundidade de 15 centímetros de formigón sobre unha base de 5 centímetros de grava, abarcando un tramo de aproximadamente 660 metros. Tamén se contempla a mellora dun tramo adicional de 250 metros con tratamento asfáltico superficial e reparación de fochancas.
Estas actuacións forman parte do proxecto ‘Mellora de viario de Pazos á DP-1202 e outros’, financiado con cargo ao POS+ Adicional 2/2023 e licitado a COSMALCA SL por un importe superior aos 60.000 euros. Durante as obras, o acceso pola vía afectada estará restrinxido exclusivamente aos residentes da zona, buscando minimizar as molestias e garantir a seguridade durante o proceso.
