O presidente da Confederación de Empresarios de Galicia (CEG), Juan Manuel Vieites, defendeu a implantación da taxa turística en Santiago de Compostela para estar “en igualdade de condicións” con outros lugares nos que xa se estableceu. “Creo que hai que estar en igualdade de condicións con outros lugares, tanto de España como a nivel internacional. Creo que é algo que está establecido xa noutros lugares e por que non en Santiago”, manifestou a preguntas dos medios tras reunirse este martes coa alcaldesa da capital galega, Goretti Sanmartín, que, entre outros asuntos, trasladoulle ao presidente da patronal o informe impulsado polo Concello en colaboración coa USC sobre este imposto de estancias turísticas.
Nesta liña, Sanmartín tamén detallou que no encontro falaron da necesidade de “potenciar o comercio de proximidade”, así como da “unión entre comercio e turismo”. “Pode ser un lugar importante para que a xente veña a visitarnos, pero aproveite para comprar e poder facilitar que teñamos un turismo que pase aquí máis tempo, pase a noite máis, sexa un turismo de calidade, sustentable, respectuoso, e tamén gastronómico, cultural ou comercial”, reivindicou a alcaldesa da capital galega.
