As festas do Apóstolo, que se celebrarán en Santiago de Compostela entre os días 19 e 31 de xullo, contarán cunha aposta case íntegra pola música en galego coas actuacións de artistas como Dakidarría e Carolina Rubiosa, un festival de cinema e un espazo para videoxogos como novidades principais.
Nunha rolda de prensa ofrecida este mércores, a concelleira de Festas, Pilar Lueiro, explicou que a programación dos festexos pretende funcionar “como un escaparate para os artistas da comunidade” e ofrecer á cidadanía actividades “diversas e inclusivas” para todos os públicos.
Entre as novidades deste ano, destacou, baixo o título de ‘Cinema Fest’, a proxección de películas en diversos puntos da cidade, así como unha xornada sobre videoxogos que acollerá a Praza Roxa o día 20.
Como en anteriores ocasións, as actividades da programación desenvolveranse de forma descentralizada pola cidade. Dentro das localizacións seleccionadas para iso atópanse os parques da Alameda, Bonaval e Galeras, e as prazas de Mazarelos, a Quintana e o Obradoiro.
Neste sentido, a concelleira de Festas explicou que este ano volverá haber un “horario especial sen ruído”, os días 20, 27 e 30 de 17,00 a 19,00 horas” e varios puntos lilas. Con todo, o Consistorio aínda non deu a coñecer quen se encargará do pregón.
“Este venres convocaremos unha rolda de prensa para presentar á persoa que lerá o pregón e tamén anunciaremos unha última sorpresa de tipo musical”, sostivo.
CARTEL DAS FESTAS
O deseño da cartelaría deste ano é obra da ilustradora e muralista compostelá Lida Cao, quen non puido estar presente na presentación da programación ao atoparse de viaxe.
No entanto, durante a rolda de prensa, retransmitiuse un vídeo no que a propia artista explicou o que quixo representar na súa obra.
“A muller que encabeza o cartel responde ao importante número de mulleres artistas que participarán nas festas e os soportais son unha chiscadela aos lugares nos que se celebran”, explicou a artista.
PROGRAMACIÓN
A Praza da Quintana acollerá, entre outras, as actuacións de Dakidarría (venres 19), Harlem Gospel Travelers (martes 23), Maro (xoves 25) e Mercedes Peón (luns 29), así como o concerto da Real Filharmonía de Galicia (venres 26) e o da Banda Municipal (sábado 27).
A actuación de Carolina Rubiosa (sábado 27) terá lugar no Parque de Galeras. Un espazo no que se esperan a Malabesta (domingo 28), Capital Voskov (luns 29) e Apart (domingo 30).
A Festa Pícara, actividade por excelencia para todas as idades, tampouco faltará nesta edición, e celebrarase o martes 23 no Parque Eugenio Granell.
